Con hopi abo conoce nos dushi Papiamento?
Mescos cu tur idioma, Papiamento tambe tin palabra cu no ta hopi uza mas of cu e generacionnan actual a lubida completamente. Hopi biaha un palabra ta bay for di moda, pasobra e obheto cu e ta referi na dje no ta wordo uza mas of a bin otroobheto na su luga.Un ehempel ta e palabra ‘washi’ cual ta referi na un tabla pa frega paña pa saca sushi. Nos no ta uza e palabra ‘washi’ mas pasobra nos no ta uza e obheto aki awendia mas, cual a wordo reemplasa pa mashin di laba paña. Sinembargo, ta bon pa nos sa cu e palabra ey ta existi y nos por uz’e, por ehempel den storia.
“Nos lenga ta un mangashina yen di tesoro valioso. Semper tin algo pa descubri, semper tin algo mas cu bo lo por siña for di dje.”
Den e tercer edicion di Palabranan Straño na Papiamento, Rocco a bolbe acerca diferente ciudadano cu e reto pa wak si nan sa e nificacion di algun palabranan di antes.Awendia no ta straño pa scucha un persona papia Papiamento cu yen Hulandes of Ingles den dje, sin cu esaki ta realmente necesario. Linguisticamente esaki ta wordo reconoci manera ‘code switching’ y ‘code mixing’.
Segun investigadora Dr. Joyce Pereira, e hecho cu Papiamento pa casi 200 aña no tabata den enseñansa, a pone cu nos hendenan a bira menos creativo den nan idioma. “Enbes di crea palabranan nobo pa engrandece nos vocabulario, ta accepta palabranan di otro idiomanan sin pensa.”
E desaroyo y conocemento di bo idioma materno ta algo sigur hopi esencial den un comunidad. Tin hopi posibilidad pa sigui na desaroya bo idioma y conoce mas di su historia na un nivel comprensivo pa tur hende por medio di diferente buki y diccionario.
Palabranan cu a wordo explora den e episodio aki ta entre otro:
Punchero [Bo lo por tin un Punchero pa presta mi?]
Definicion: Un weya grandi.
Sirbishi [Mi ta invita bo pa bay sirbishi di Diadomingo]
Definicion: Un servicio di misa.
Bo ta keda invita pa keda pendiente cu eAmigo pa mas contenido creativo y
educacional, cu e meta pa sigui inspira y stimula desaroyo, progreso y conservacion di tur locual ta nos historia, cultura, y hopi mas riba nos canalnan interactivo di eAmigo Stream!